Psa 126 | CebAPD | STEP | Sa dihang gipauswag pag-usab sa Ginoo ang Zion, daw nagdamgo lang kita.

Psalms 126

Pag-ampo alang sa Kaluwasan

1 Sa dihang gipauswag pag-usab sa Ginoo ang Zion, ^{▼▼Sa dihang gipauswag… Zion: o, Sa dihang gipabalik kita sa Ginoo sa Zion gikan sa pagkabihag.} daw nagdamgo lang kita.
2 Nangatawa kita ug nagaawit sa kalipay.
Unya miingon ang ubang mga nasod,
“Naghimo ang Ginoo ug katingalahang mga butang alang kanila.”
3 Tinuod nga naghimo ang Ginoo ug katingalahang mga butang alang kanato,
ug labihan gayod ang atong kalipay.

4 Ginoo, pauswaga kami pag-usab, ^{▼▼pauswaga kami pag-usab: o, ibalik kami sa among dapit.}
maingon nga pabahaan ug tubig ang nagauga nga mga sapa sa Negev.
5 Ang nagapugas inubanan sa mga luha moani nga malipayon.
6 Sila nga naghilak samtang naglakaw dala ang binhi nga igpupugas mag-awit nga malipayon sa kaulahian dala ang ilang mga abot.